MGA BALAK (Ika-limang Tagay)

GARBO

Tinagik  ni  RONIE  M. CATADMAN

Gitangkil  kang pagbati sa tig-ag kasingkasing

Nagpasulabi kang naghulhog sa lantip  nga salabotan

Gisipong  kabangis  mihari  sa kahiladman

Nanuasik mitna sa katarong  nga gitamdan!

Pagbating  nakapuhag  sa gigakot  nga pagsabtanay

Gibadbad  ang talikala  nga nagtakgos   sa gugma

Mokawras  sa dughan  mohaling sa kasilag-

Moyuhom  sa hilom  nga mahimut-on

Magsud-ong  sa kabanyaga!

Makamandag  kon moulipon  sa kahiladman  sa tawo

Daghang  kasingkasing  nagdugo  sa  kahiubos

Gumikan kanimo,

Luha nangagay: nagbakho  mga  timawa

Giyatakan  sa katungod  sa mga adunahan

Ikaw maoy nagahulhog!

Kanu-as ka pa kaha  mapukan. . .

Aron ang pagkabantiliison sa pagbati  mahanaw

Malangkat  ka ning dughan

Nga nailo  na sa kaluoy ug

Mokunsad  sa kalibotan   ang  kalinaw-

Gugmag   pakigdait  sa katawhan  mopatigbabaw!

BAYHON  SA SUGAL

Tinagik  ni  RONIE  M.  CATADMAN

Ang sugal :

     maoy  kanako nakapaalaot

    salapi  ko nahanaw lawas na midaot

    king  kinabuhi  nagduhiraw  nauyamot

    sa maanindot  nga tingusbawan  koy nakaparot!

Ang sugal:

   maoy  buhat  walay  hinungdan

   away  maoy maani,maoy   kalagmitan

   sab  tawo  makasala  sugal  ang  hinungdan

   sugnib   sa tawo  pag-utol  sa kauswagan!

Ang  sugal :

   sakit  sa katilingbang  taspokan

   nga dili mamaayo  sa tambalanan

   kay kagawng  gipalambo   midahan

   nga sa  lubnganan  matapos  ang tanan!

   

HUSTISYA

Tinagik  ni  RONIE  M.  CATADMAN 

May  hustisya  ba nga makita  diha  sa

    Latagawng  mga  anino  nga way hunong

        Nga nakigbisog  sa  abogong  disyerto

            Nga gigamhan  sa  kahakog  ug panlupig? 

May hustisya  ba nga  mobarog

    Nga lintunganay  nga  makigharong

        Sa igmat  nga  mga Buaya  sa katilingban

            Nga  naglimin ang suburno  ug pangurakot?

May hustisya  ba  nga  maangkon

    Sa  kalag  nga  nagbakho  kay biktima  sa lingla

        Sa kadunggganan  nahunlak  nga  gikuniskunis

            Sa  kuko  sa limbong   ug kahangol?

Kon  ugaling may Anghel  man  sa hustisya

    Nga  mokunsad  ning sulad  sa mga kasakit

        Pangindahay  sa mga kalag nga alaot

            Silotan ang nakasala :  Patas  ug walay  pagpinig!

P.S.: Kining Balak( HUSTISYA),gipatik sa Bisaya Magazine,gula Pebrero 26,2014.

ABALINGAG

Tinagik  ni  RONIE  M. CATADMAN

Gitadlas  ang  wanang  sa

kagabhion  sa  naglatagaw  kong 

hunahuna  nga  gigil-asan  sa 

nag-ul-ol  ug  naghiting- hiting

nga  pangandoy!

Ug  kon  moabot  man  ang

pagkuyamang  sa  laing  subang  sa 

Kabuntagon  may  paglaom sab

unta nga mahimugso  nga 

mosungasong  sa  mga  pagsulay!

Dinhi  sa  walog  nga  mausabon

tigson  pang molahutay  ang  lanat

sa  mga damgong  nagdibal sa 

hunahuna  nga  gigamhan  sa  

nagtibi  nga  kahaw-ang!

Apan,ay!  Usa  lamang  kini  ka  pangindahay  nga nanghimusak  sa

walay  tinong Panahon,nga  ning

silong  sa  Langit  walay

makasugid   anus-a  mohunong

ang  mga kamot

Sa  imong  Taknaan!

LUNGTAD

Balak  ni  RONIE  M.  CATADMAN

Unsay   tam-is   sa  kinabuhi

Nga  maglunang  sa  daghang  bahandi

Nga  mosuknib  sa  dilaab   sa

Garbo  nga  gibati?

Unsa  bay  laraw  sa  pagpakabuhi

Nga  maghupot  ka  sa  gahom

Nga  motublaw  ang  pagdayeg

Nga  may  anino  nga  magdaghong

Sa  pangabuso  mag-ilaid?

Ah,  unsay  bili  sa  kinabuhi

Nga  isalindot  lang  ang  mithi

Nga  giumol   sa  Labawng  Bathala-

Patuyang  nga  gigamhan  sa  kahungog!

Ay,  tawo  palandunga  nganong  may

Utlanan  sa  pagpakabuhi:  gilatid

Nga  tunhay  paghimugso  niining  sulad

Nga  dalyang  sa  mga  kasakit!

ooo000ooo

MGA BALAK(Ika-upat Nga Tagay)

ANG     NAHANAWNG   BALAK

Tinagik ni  RONIE  M. CATADMAN

Lupad,panumdoman! Sulbong sa kawalaan!

Himamatang  kalimot  sa limbo

Sa mga damgong  buot nga makab-ot

Nga makatambal- maghingilin

Sa  gasalimuang kong mga takna!

Sa kalimot  isumbong  ang kapakyas

Nga gibati  sa dughan

Sa pedestal  sa akong  paglaom

Nga nahun-ag  sa kamatayon

Sa  mga gutlo  nga naghikaw

Sa nagsugwak  nga  pangilaba!

Lingi-a  ayaw  kagahapon  ko 

Nga nagkagidlay-

Diha sa mga mata  sa kahinugon

Nga magsid-ing  sa gidangatan

Sa luha biawan  basuni  sa  akong

Kasingkasing!

Sa  malaay  unya nga pag-usara

Nga motaob  na ang kamingaw-

Sa nagusbat  ko nga kalibotan

Sa huyuhoy  kasubo  ko iduhawit

Sa garay  itagik  kong  pagmahay

Nga gibati

Ug sa nagdeleryo   kong  langit

Nga gilad-an  sa naagkong kabalaw

Sa nagpasad- napusgayng  mga bituon

Sa  kangitngit  sa mingawng  lubnganan

Himamaton  ko ikaw,gakson  sa paghugot

Ikawng  balak  sa akong  kinabuhi

Nga nahanaw...!
                                                                            000

P.S.: Kining Balak( Ang Nahanawng Balak),gipatik sa Bisaya Magazine,gula Septiyembre 29,1999

DUHIRAW  SA  KAMINGAW

Tinagik  ni  RONIE  M.  CATADMAN

Balik  na pinangga  ngari  kanako

Nga  sa matag gutling  kong  gihandom

Sa  masulub-on  kong  paghanduraw

Sa  mga  gabiing  gikusi  kining  kasingkasing

Nga  nailo  sa  mainit  nga pagmahal

Nga  gilumsan  sa  tuman  nga  kamingaw!

Sa  nagdibal  nga  kalibotan

Nga   kanunayng  gikawras  sa  pagduhaduha

Sa  hadla  sa daman  ug  mga alimungaw

Nga way  puas  nga misikdo  sa  kaligdong

Nga  karon  nagbaharag  na  sa huros

Sa nagdaghong  nga katahap!

Sa  ngilbit  sa   akong  pangindahay

Sa  pangilaba  nga  naglumpayat  sa  akong

Dughan kon ulahi  man  moabot  ang ugma

Tition  ko  ang tanan  kong mga kasakit

Sa  kapahulayan  nga  wala  nay  pagbalik!   

1/14/2014      7:00 PM 

GUGMANG  MAUSABON

Tinagik  ni  RONIE  M.  CATADMAN

Nanaligdig  luha  sa kahinugon mibiaw

Kanhiayng  kalipay  sa handurawan

   gibanhaw

Mga  sonanoy  tahom  sa nangagi

   nanumbalik

Kadtong sugid  sa gugma  sa garay  gitagik!

Sa  pungkay  sa  himaya  buot  kong  kab-uton

Sil-ip  sa mga bituon iwag  sa  paglaom

Sa  gugmang  gipuyos  sa  saad  ug panumpa

Sa kamatayon  mag-inunongay dili

   malugtab!

Sa  dughan  ikaw  sa  pagmahal  natingban

Suga  sa mga pangindahay  nga gipulawan

Sa  kalag  ko ikawng  Bathala  nagadasig

Sa  wagas  nga  kalipay  kanunayng  gimithi!

Apan  sa gilauman  aso nga nahanaw

Sa  limbong  gidagit  panumpa napukling

Sa kamatayon mag-inunongay  sa budhi

   gihikling

Ang  pungkay  sa himaya  idlas  nga

   mipanaw!

Karon...nanaligdig  luha  sa  kahinugon

   mibiaw

Kanhiayng  kalipay  sa  handurawan

   gibanhaw

Mga  sonanoy  tahom  sa nangagi

   nanumbalik

Kadtong  sugid  sa  gugma  sa garay  gitagik! 

 ANG  KAMINGAW

Balak    ni  RONIE  M.  CATADMAN

Pasagdi   nga ang  huni  sa kamingaw

   anhi ko na lang ipabati

   sa  pipila  ka tudling  sa garay

   nga  natagik  sa  mahandumong

   kasingkasing

Pasagdi  nga  ang  masakit  nga  paghandom

   anhi ko na lang ihunghong

   sa  gihay  ning  mga  rosas

   sa  akong  tanaman

Sa  bulak   nga  maamyon...

   Iubay  kong  kahumot  sa  pangindahayng

   nagdalyang...

   sa  mensahe  sa  gugma

   nga  nagpabiling   buhi

   sa  akong  pag-usara

Pasagdi,  nga  ang  kamingaw  moitos  sa

   Dughan...

   nga  mobitad  kanako

   sa  lubnganan...

   nga   ang  luha manahili

   maglilo  dire   sa   akong

   mga   aping!

Pangitaon  ko  unya  ang  nagkahanap  mong

   Larawan...

   luyo  sa  bughawng  panganod...

   idip-ig  ko  ikaw  sa  akong  dughan

   sa  dili  pa mohagtos   ang

   kuldas  ning  kinabuhi

   pamasin  nga  mabati  pa  nimo

   nga   gihigugma  ko  ikaw...

MGA BALAK ( Ikatulong Tagay)

PAILOB

Tinagik   ni     RONIE M.CATADMAN

Pasagding mga pagyubit nga gisablig sa imong kaugalingon,

Pasagding  mga tabi nga nagwakat sa palibot;

Buhiang  paglaom kanunayang  kadasig;

Maoy kalasag  sa pagpakabuhi!

Daghan ang napukan sa tigi,

Ingon nga may  midaog  gipasidunggan;

Tagsatagsa  nagkadaiya  ang dalan  nga gilatid-

May gumaran  nga gisubay  makab-ot  kalipay  sa hingpit!

Paabota ang ugma...  lig-ona  ang pagtuo,

Isilsil   sa kaisipan   ang katarong  ug kaligdong;

Sa  kasingkasing  PAILOB  amomaha-

May ganting  mapaabot ni  Bathala!

Busa,pailob... pailob...

Andama  ang imong  kaugalingon  sa mga pagsulay;

Pukawa  ang determinasyon  nga  hapo sa  pangimbisog-

Pukawa  kay wala pa matapos  ang bugno sa  kinabuhi!

DIWA  SA  PASKO

Tinagik  ni   RONIE  M.  CATADMAN

May pagbating namuklad

Sa panahon sa Pasko  gihalad

Sa Katawhan may bililhong gasa

Gugma'g  pakigdait  sa dughan  giamuma!

Ang Pasko maoy bililhong paghandom

Niadtong Bata nagpakatawo sa pasongan

Mensahe  dili angay nga hikalimtan

Sa katawhan nga natubos sa iyang pagmahal!

Sa Pasko nga ingon niaron

Pagminahalay maoy atong palamboon

Pagtuo  sa Diyos ing walay sama

Sa lunsay nga kinabuhi kalinaw way ikatumbas!

Sa Pasko nga ingon niaron. . .

Pag-ampo  ug pagsalig alang kang Hesus

Sa kalipay ug kinabuhi bugtong  Siya  maoy giya

Tuboran  sa kaaghop,gugma ug kaluoy!
000

P.S.: Kining Balak( Diwa Sa Pasko),gipatik sa Bisaya Magazine,gula Disyembre 22,2004

Napatik sa SuperbalitaCebu,Disyembre  14,2023

LAMDAG  SA  NAHISALAAG
Balak   ni   RONIE  M.   CATADMAN

Gusbat  ang  dagway  sa  langit

Nga  nagsud-ong  sa mga  anino

Nga  nahisalaag  sa  dalan

Nga  naghatod  sa  Kalaglagan!

Silabon  may  latid,matarong

Ug tigson  nga  kasugoan

Nga  moagak  sa kaputli

Nga  mahambin  sa  dughan

Ang  timgas  nga  himaya!

Sa  gihapon  ang  mga  anino

Nagpahaylo  sa  mga  limbong

Nga  nagpaabot  ang  laang

Nga  gipasad  sa  danglog,plastik

Nga  Kalibotan!

Subsob  ang  paghilak  sa  Taknaan

Nga  nahinugon  sa  kinabuhi

Nga  gikutkot  sa mga  sala

Nga gipaagasan  ug dugo didto

Sa  Balabag !

Sa  disyerto  sa kahimatngon

Nga  gihalad ang sakripisyo

Ang  mga  anino giagni

Pagsagop  sa pedestal nga matarong

Nga  timgas  ug Balaan!

(Ang  sakripisyo  gidayag:  Siya  ang  Dalan. . .

Ang  kamatuoran  ug tunhay  nga  kinabuhi !)

DIWA  SA   PASKO

Tinagik  ni  RONIE  M.  CATADMAN

May  diwa  pa  ba kaha

Ang  Pasko  diha  sa  naughang

Disyerto  sa  gugma  nga  giitos  sa

Naglagiting  nga  kainit   sa  kahakog

Nga  maoy  nagpabilo  sa  -

Kalagnong  kauhaw?

May  solemni  pa  ba kaha

Sa  timgas  nga  kalinaw -

Ang  diwa  sa  Pasko  nga  mo-iway

Diha  sa  kagahob  nga  nagdibal  karon:

Nga  gigamhan  sa  tawhanong

Pagpanglupig,pagsupak  sa  mga  balaod

Nga  miganoy  sa  niluog  nga   panamastamas?

Kon  ugaling  mokunsad  man  ning  Yuta

Ang  Manulunda  nga  magsangyaw   sa  KALUOY

Nga  molukmay  sa  kasingkasing  tig-a,

Nga  mobatyag  sa  lunsay   nga  gugma

Ang  diwa  sa  Pasko ,  mobug-os  sa

Langitnon  nga  Himaya!

-000-

12/07/2022

P.S. :Kining Balak(Diwa Sa Pasko),gipatik sa Bisaya  Magazine, Gula sa Disyembre 2023 .

PASKO  KARON

Balak  ni  RONIE  M.  CATADMAN

Pasko,  Pasko  na  karon;

Magsadya, magsadya  ang  tanan;

Kalimtan,  kalimtan  mga  kagul-anan-

Saulog  sa  kalipay  ipatigbabaw!

Pasko,  Pasko  na  karon;

Natawo na  ang  Balaang  Bata;

Tuboran  sa  gugma'ng  way  pagkapaas-

Nagmanggad  sa  kaluoy  way  paglubad!

Pasko,  Pasko  na  karon;

Pangamuyo  sa  tunhayng  kalinaw;

Motuhop  sa  kasingkasing  bantiliis-

Ihikling  pagdumot, isalindot  kabangis!

Pasko,Pasko  na  karon;

Pagsabtanay  sa  katawhan  hangopon;

Hunahunang  gipuyos  sa  kalibog  nabuyok-

Lamdagan  na  sa  Diyosnong  kaaghop!

Pasko, Pasko  na  gayod;

Magsadya,  magsadya  kitang  tanan;

Kalimtan,  kalimtan  mga  kagul-anan-

Saulog  sa  kalipay  ipatigbabaw!

ooo000ooo

12/08/2022

Gipatik sa Mantalaang SuperbalitaCebu,kining maong Balak(Pasko Karon),gula Disyembre 21,2023

TAHAS  SA KINABUHI

Balak  ni  RONIE  M.  CATADMAN

May  tahas  ka  niining

          kinabuhi

Nga  dili  sulagma  ang

         panghitabo

Nga  gitabyog  sa  mga 

         gutling

Nga  gihikap  sa  tuyok  sa  

         imong  Takna!

May  tahas  ka  niining

        kinabuhi

Nga  sundon  mo  ang 

          katarong

Pagsalikway  sa  tintal sa

          kabanyaga

Nga  milikos  sa  piyasot

          mong  Kalag!

May  panahon  ka  pa niining

          kinabuhi

Hangpa  ang timgas  nga

         kaligdong

Diha  sa  kasingkasing  mo

         palamboa

Balaang  Pulong  kay  tanos

     nga  giya!

Oo,  may  panahon  ka  pa

         ning  kinabuhi

Nga  bug-os  tagamtamon

          ang  kalipay

Sa  walay  pagkahupas  nga

         pagkalawat

Ug  pagyukbo  Kaniya  nga

         Manluluwas!

-ooo000ooo-

P.S.: Gipatik kining  balak: Tahas Sa Kinabuhi sa SuperbalitaCebu,gula Marso 16,2023

                    

 

 

 

MGA BALAK (Ikaduhang Tagay)

PAGLAOM

Tinagik ni RONIE M. CATADMAN

Anus-a kaman motim-aw 

Sa nataran sa akong paningkamot

Aron binlan mog kadasig

Ang nag-udhak kong Taknaan-

Sa pagpangligdas sa katuigan

Way puas kining mga kasakit

Sa dughan kong nailo

Sa imong pagpangluod!

Silabon naa ka kanunay

Nga mo-agakay sa akong dalan

Nga nagpasad ang lit-ag

Sa daghang mga pagsulay!

Karon dungga kining pangilaba

Nga modaligdig sa tulmaan nga naughan

Sa kahiamgo nga nangagiw

Nga moturok pa pagbalik

Ang binhi  sa timgas  nga paglaom!

ANG  KALINAW

Tinagik  ni  RONIE  M. CATADMAN

ANG  KALINAW  :

                             Maoy  HUNI  sa panagdait

                             Nga gipangandoy  sa matag usa

                             Nga sa kasingkasing  unta mohunit

                             Sa  kanunay  ana-a  ang panaghiusa!

ANG KALINAW :

                           Maoy  timaan sa kaangayan

                           Nga gipangaliya  kang Bathala

                           Nga  makamtan  ang katunhayan

                           Sa dughan  buhong  nga pagpangga!

ANG KALINAW :

                           Maoy  busay  sa KALIPAY

                           Nga  ang kabugnaw (sa kalag motapot)

                           Nga  ang kasakit mahupay

                           Sa tim-os  nga pagtuo makab-ot!

ANG KALINAW  :

                            Maoy mga pagawng  awhag. . .

                            Nga sa lubnganan  da  matubag!

GINOO,LUWASA  AKO

Tinagik  ni  RONIE  M.  CATADMAN

IKAW   ang  akong  taming

Sa pagpakabuhi...

Luwasa  ako

Sa naglutos  kanako

Aron  dili  ako nila

Taralon  ug kuniskunison

Ingon  sa himoon

Sa usa ka bangis  nga leyon

Ug walay  makapanalipod!

Ang  IMONG  pulong maoy  suga

Nga nagtultol kanako

Ug kahayag  sa  akong  agi-anan

Tumanon  ko  gayod

Ang akong mga panaad,

Sa pagtuman  sa matarong

MONG   mga pahimangno.

GINOO,dako  kaayo

Ang akong  pag-antos:

Buhia pa ako...

Sumala sa IMONG  gisaad!

(Addendum:Napatik sa SuperbalitaCebu Sept.28,2023) 
Gipatik sa Bisaya Magazine,gula Abril 11,2001

PAGLAOM

 Tinagik  ni   RONIE  M.  CATADMAN 

Kaniadto  diha  ka  kanunay

Nga  moagakay  sa  akong kabuntagon

Nga  nagpasad lit-ag

Sa  daghang  pagsulay!

Apan  pagpangligdas  sa   panahon

Way  puas  mga  kasakit

Sa  dughan  kong  nailo

Sa  imong  pagpangluod!

Kanus-a  ka man  diay  mopatim-aw

Pagbalik  sa nataran  sa  akong  paningkamot

Aron  binlan  mog  kadasig

Nag-udhak  kong  taknaan?

Karon, ipakita  kanako

Imong  adlaw  aron  ang  kahayag  mohatag  lamdag

Pagwalis   sa  kangitngit  nga  nagtabon

Sa  matimgas  mong  binhi

Nga  gihigdaan  lamang  sa  nagpanghuy-ab  kong

Mga  gutlo!  

PANINGKAMOT

 Tinagik   ni  RONIE  M.  CATADMAN

 Nalambid  sa  kilumkilom  nagtingang  kadasig

Kahayag  inanayng gitukob sa  kawalaan

Sa  kalikopan  maoy  mihabol

Ataong  kangitngit  mibathay  sa  langit!

Luspad  ang dan-ag  nga gisabulak

Sa  mga bituon!

Dili  sarang makabuntog  sa kangitngit

Igang huyuhoy  mihukaw

Sa  nagdukang  mga  gutlo

Sa  pamalandong!

Sa  pag-usara  mibulto  ang kahilom

Sa  kaisipan kahingawa nagbuyok:

Malun-as  ba  o manaha

Pangandoyng  giluyong. . .

Sa  dugayng  panahon  gitangkil

Nga  mapailubon!

Mipahulay  ang  lawas  nga lapoy

Diha  sa  sabakan  ni Nanak

Pagtuo  diha  sa pahulay gibug-os

May  Kahayag  pang moabot

Saad matuman  diha  sa

Way  puas  nga paningkamot! 

P A G B A G - O
Tinagik  ni  RONIE  M.  CATADMAN

Pagbasol... pagsubo...pagbag-o

Nagkayabag  na  ang tuyok  sa  taknaan

Nga  namidpid  sa hanap  nga kilumkilom

Nga  nagtali  sa  anib  sa  kinabuhi

Sa  bantawan  sa  damgo-

Hangpa  ang  anino  sa kahimatngon

Diha  sa hunahuna itisok  palamboa:

Sa  pagkamatarong  may  tam-is  ibunga

Sa mga makigdaiton  sa  kalinaw!

Sukli  ang  tintal  sa kinabuhi

Sa  kahuyang  nga giukiot  sa katalaw

Nga  ulipon  sa bisyo  ug kaulit

Nga naawat  sa  garbo!

Hilwas   diha  sa pagduhaduha

Panamin na  diha  sa kahayag. . .

Nga  molimas  sa  mga  lapok

Nga  mitapot ug  mibagtok

Sa  kalag  nga nahinanok!

Pagbasol. . . pagsubo. . . pagbag-o

Galamhan  sa kaputli  itagana

Sa dughan  ikalawat  sa  timgas  nga  pagtuo:

Dili  pa  ulahi  ang pagsagop  sa  kamatuoran! 

UNSAY   BALAK
Tinagik  ni   RONIE  M.  CATADMAN

                                                          

Unsay   balak ..... ?

Deleryo   sa   wala  dinhi,   sa  wala  didto

Nga  mokulitog  sa  imong   alimpatakan

Nga  tugkaron  giladmon  sa  mga pulong

Nga  gilambod   sa  pagtagik

Nga  mabuyok  ang   trabungko

Sa  imong  utok?

Sus,  ngano  man   gyung  lisdon

Nga  ang pagpadayag  libre

Nga  hangpon  sa  timgas  pagsabot

Kay  sa   daghan  pang  estorya

Nga  daghan    sab  ang  sayop!

Ngano   diayg  klarohon?

Nga  walay bikil  ang  dila   paglitok

Nga  walay   hunahunang   bitaron ngadto

Sa  kabalingag  sa mga  pulong   gihan-ay

Nga  dayandayan  ra  ug    makalibog!

MGA BALAK(Unang Tagay)

BAGAD  SA KINABUHI

Tinagik  ni RONIE  M. CATADMAN

Alaot  ang kabos tuaw sa linupigan,

Sa kahimtang materyal walay ikadalit;

Uhaw sa butang sa salapi lang makab-ot;

Sa kahaw-ang nga sa dughan lang gitago!

Bulahan ang adunahan himaya ang pagpanlupig,

Sa kahimtang  luho sayon maangkon;

Tugob  sa butang sa pangandoy  matuman;

Sa lunang bahandi padayong  gipalambo!

Busa kabos nga higala kahimtang ayg  ikamahay,

Hinunoa sa kadasig  lig-onang  pagtuo;

Sa bahandi kaugalingon  mo ayaw butai;

Kalag maoy ampingi  nga dili maalaot!

Sa ngilbit  sa pagsulay  padayon makigbisog,

Sa pag-ampo  nga putli  maoy kalasag;

Sa diwa Kaniya himoang bililhong mithi;

Tanan may kinabuhi sa lubnganan adto mopauli!

PAABOTON KO IKAW

Tinagik  ni  RONIE  M. CATADMAN

Mibiya ka kanako nga walay pulong nga gibilin

Sa payag tang kabos uyamot nga kahimtang

Akong pangilaba bungol mong gitalikdan

Kasakit nagbalanosan nga gisaog ning kasingkasing!

Kanako ka nagpahilayo nabuyok sa pangutana

Ngano ? Pinangga, unsay sala kong nabuhat?

Tug-ani ako! Sayri sa matuod nga hinungdan

Kapit-os nga gitangkil mao ba kanimo ang nag-awhag!

O,matuod kabos lamang ako nga kanimo nahigugma

Putli ug tiunay nga gihambin niining dughan

Sa nagkagidlay kong kalibotan nga sa huwaw gihadla

Ikawng lamdaman sa hamilsing kong mga tinguha!

Sa maasgad nga luha iubay ko na lamang mga kasakit

Nga naghundahos niining dughan nga inayran

Kadtong saad sa gugma mo kanakong sa budhi giitos

Palad nga naangkon kalawaton na lamang sa pagpailob!

Kon sa kapulihay moabot man ang buntag sa kahimatngon

Nga ang kasakit kong labihan dunggon ni Bathala

Kanako ka mobalik basolan sayop mong gituohan

Paaboton ko ikaw,ipadayon tang tigbayon nga nasandaw!

P.S.: Kining Balak(Paaboton Ko Ikaw),gipatik sa Bisaya Magazine,gula Oktubre 29,2003

KAMATAYON  SA HIGALA  KONG  BAHANDIANON

Tinagik ni  RONIE  M.  CATADMAN
9/14/2014

Gisil-ip  ko  ikaw  nga nia wala  nay  paggunok

Sa  salamin nga nag-ulang  kanato

Nga naa ka sa sulod  nahinanok

Ug  ako  nia  sa gawas  nag-antos  pa  sa mga lamok!

Silabon  panagway  mo kanunayng  saya

Nga  gilikosan  sa daghang  talidhay

Nga gihambin  mo  ang tuman  nga kabuhong

Sa  naglunang  bahandi  nga katumanan  sa 

Tanan  mong  mga damgo!

Apan  nganong ingon  ka  sa nagpanghawid

Nga naglarawan   ang imong bayhon

Sa ugdang  nga kawili ug mga kasakit

Nga nia kana niining kuwadrado  mong lawak!

Nga dinhi  mo na ba gibati ang kahiamgo ?

Nga bisan unsa ka taas  sa dalan  nga subayon

Nga tanan  dunay utlanan  ug walay  lintunganay

Sa  paghakgom  sa daghang bahandi

Kon ikaw  mopanaw na ning sulad  sa mga buhi!

ALIMUNGAW

Tinagik  ni  RONIE  M.  CATADMAN

Mitidlom  nang                                                             kahimtanga

     kalimutaw                                                            Nga    bisan  sa  pagpahulay

Diha  sa  nagbagtok   nga                                      King  hunahuna

     kagabhion                                                                 nagduhiraw   pa

Nga  giganoy   sa                                                     Sa   kalandrakas   sa  mga                                          nagpangawhat                                                         numero

Nga  kuyamoy  sa                                                    nga  bisan  sa  katulugon

    katulugon  dihang                                                    mogimok

Sa  damgo  nagdibal  ang                                      Ang  sulsol   sa   way  puas

    mga  eksena :                                                             nga  tintal

Pak!  " Yaks, naunsa  ka,                                        Sa     pamasin!

    Toryo?

Nga  gayamyam  kamag                                       Salamat   sa  aninag   sa 

    numero!"                                                                      kahiamgo

Singgaak   sa  akong                                                Nga  mitim-aw  sa  nag-

   katupad   nga                                                               alindasay

Natugaw  sa  iyang                                                   Nga  kangiob  ug misiak   sa 

    pagkahinanok.                                                            kasibot

Ay, pagkatuytoy !                                                      Sa  tigmi  nga  hapuhap   sa 

    Nagdunghay  ko                                                          huyohoy

Sa  singot.  Kalit  kong                                              Nahigmata  ang  kalag   nga

    mitimbakuwas                                                             nagdamgo                                            

Nga  nagpanghikap  sa                                             Sa  dili  madugay  molanog

    aping  kong                                                                   ang  tuktugaok  

Nawingig  kay  gisagpa  ni                                       Magsangyaw   sa  lain     nga

    Kulasa!                                                                            kabuntagon

Ay, pastilan  ning                                                         Nga  tigson  nga  moharong         

                                                                                              sa  kahayag!

HAGAWHAW

Balak  ni  RONIE  M. CATADMAN

Nagkurog  ang mga kuyamoy sa

Taknaan

Nga nakig-unong  sa  pagtuyok  sa

Panahon,

Nga  nakiglumbay  sa  daghang

makaugtas

Nga pag-utong  diha  sa nagkayagawng

udhak

Sa  nagbagtok  nga  Pamasin!

Nga unsa  bay  katinoan sa  umaabot

Nga nagkiros  daghang  pangilaba,

Nga unta mosidlak  ang  dan-ag  sa timgas

Nga  kahayag  nga  nasulaw  sa  daghang

Kalampingas  nga gipasad...!

Ah, unsa pay  bili  sa 

Imong Pulong

Nga  nawad-an  na mag-umoy   nga  kanhi

Tuskig  nga  pangaliya ?  Nga  nahimong

Deliryo  diha  sa subsob  nga  pagbakho.

Kuli  na nga mabati  bisan  sa  makabungog

Nga  hagawhaw!

Kudos: Nahipatik sa Superbalita Cebu, 5 Oct.2023

ooo0ooo